VajontS 23, el 9 ottobre 2023, a 60 ani de la tragedia azion corale de teatro civil in 130 teatri in contemporanea
A TRIESTE, LA CONTRADA PORTA IN SCENA VAJONTS 23
UN SPETACOLO ITINERANTE NE LE GALERIE DE LA KLEINE BERLIN CO LE VOSI DEI ATORI DE LA CONTRADA E LE PROIEZIONI DE MARIO BOBBIO
un progeto a cura de Enza De Rose e Mario Bobbio
con (in ordine alfabetico) Enza De Rose, Zita Fusco, Valentino Pagliei e Leonardo Zannier
e co la partecipazion de Paolo Quazzolo
coreografia danzada de Irene Ferrara
musiche de Enza De Rose e Mario Bobbio
produzion La Contrada – Teatro stabile de Trieste
Trenta ani fa El racconto del Vajont iera la vose e el corpo de Marco Paolini. La sera de luni 9 otobre 2023, nel 60esimo aniversario de la tragedia del Vajont che ga costà la vita a 2000 persone, diventerà VajontS 23, azion corale de teatro civil messa in scena in contemporanea in 130 teatri dal Alto Adige a la Sicilia e anche al estero.
Zita Fusco
A Trieste Vajonts 23 sarà messo in scena da la Contrada alle 21.30 ne i spazi de la Kleine Berlin de via Fabio Severo (davanti el civico 11), el più grando sistema de galerie antiaeree soteranee ancora esistente in centro cità a Trieste, co un spetacolo de leture sceniche itinerante insieme a le vosi dei atori Zita Fusco, Leonardo Zannier, Valentino Pagliei e Enza De Rose – che sonerà anche dei tochi inediti a la tastiera – e con le coreografie de la balerina Irene Ferrara e le proiezioni de Mario Bobbio; inoltre, a far de epilogo, l’intervento academico del Prof. Paolo Quazzolo, profesor asociado de Storia del teatro nel Dipartimento de Studi Umanistici de l’Università dei Studi de Trieste.
La storia del Vajont scrita de novo, 25 ani dopo el raconto televisivo, de Marco Paolini co la colaborazion de Marco Martinelli, dramaturgo e regista del Teatro de le Albe, no xe più solo un raconto de memoria e de denuncia social, ma diventa una sveia. La narazion de quel che xe nato se moltiplica in un coro de tanti raconti per riciamar la atenzion su quel che poderia nasser. «Quela del Vajont – spiega Paolini – xe la storia de un avenimento che inizia lentamente e po acelera. Inesorabile. Se ga ignorà i segni e, quando se ga ciolto cosienza, iera tropo tardi. In tempo de crisi climatica, no se pol ripeter le inerzie, no podemo permeterse de calcolar el ris’cio co la ipotesi meno pericolosa tra tante. Tra le tante scartade perché inconcepibili, no perché imposibili».
Grandi attori e allievi de le scole de teatro, teatri stabili e companie de teatro de rizerca, musicisti e danzadori, maestranze, personal e spetatori aruoladi come letori se ingrumerà nei posti più diversi, dal Strehler de Milan ai pici teatri de provincia, a scole, cese, zentri civici, biblioteche, piaze de quartier, dighe e centri parochiali. Ognidun realizerà un suo alestimento de VajontS 23 a partir da le peculiarità del suo teritorio. E po, tuti se fermerà a le 22.39, ora dove la montagna ga franà ne la diga.
«La Contrada – spiega i ideatori del progeto Enza De Rose e Mario Bobbio – ga sentido fortemente la necesità de partecipar a sto spetacolo coral realizado su scala nazional per ricordar un disastro che rimanda ancora ogi, purtropo, a tematiche cussì atuali. Sta azion de teatro civil che afronta una sfida vitale, quela dela crisi climatica. La tragedia del Vajont diventa cussì un punto de partenza per rifleter su le pratiche de tutela del ambiente traverso azioni che parti per prima roba dei singoli, de ognidun de noi, e dal bisogno de una educazion civile».
VajontS 23 sarà come un canovazo. Ghe sarà chi lo meterà in scena per intiero, chi lo doprerà come un spunto e lo ligherà a le tante tragedie anunciade che xe nate dal 1963 fin a ogi: in Toscana la aluvion de Firenze del 1966, in Piemonte se raconterà de quando el Po e el Tanaro ga straripà nel 1994, in Veneto de le aluvioni del 1966 e del 2010, in Campania de la frana de Sarno del 1998, in Furlania dei foghi del Carso nel 2022, in Alto Adige de la valanga de la Marmolada del 3 luglio del 2022 e in Romagna de la aluvion de magio.
Quatro postazioni, ne la Kleine Berlin, dove se riva caminando ne le sue galerie soteranee. Una ambientazion perfeta, un poco claustrofobica, intimista per el spetacolo corale Vajonts 23, ideal scenografia per riviver ad alta vose el testo de Paolini. Ne le galerie, percoribili grazie al CAT, el Club Alpinistico Triestino che cura la gestion, risonerà le vosi dei atori Zita Fusco, Valentino Pagliei, Leonardo Zannier, Enza De Rose inframezade de musica, i passi de la balerina Irene Ferrara e le proiezioni de Mario Bobbio. Percorse le galerie, a le 22.39, ecola là , l’aqua co la sua fragorosa potenza. A far de epilogo sarà el intervento del prof. Quazzolo che de academico spiegherà ripercusioni e conseguenze che ga avudo quela tragedia nel nostro teritorio.
Ingreso libero fin con xe tuto ulmo. Prenotazioni sul sito web de la Contrada www.contrada.it o telefonando al 040948471 .
Sul sito www.lafabbricadelmondo.org xe posibile trovar la mapa intiera dei grupi che ga aderido e dei loghi dove VajontS 23 anderà in scena el 9 otobre.
La rede de Vajonts 23 nassi de un idea de Marco Paolini per Fabbrica del Mondo e xe realizada da Jolefilm co la colaborazion de Fondazion Vajont.
